മീന്‍ മുറിക്കുമ്പോള്‍

അമ്മ മീൻ മുറിക്കുന്നിടം നിശ്ശബ്ദമാണ്.. വാഴക്കയ്യിലും വേലിയിലും മൂന്ന് കാക്കകൾ ചുറ്റുപാട് വീക്ഷിക്കുന്നുണ്ട്. വാഴച്ചോട്ടിൽ, അമ്മിക്കരികിൽ ഓരോ പൂച്ച വീതം.. തല വെട്ടിച്ച് നാല് കോഴികൾ പൂച്ചയേയും കാക്കയെയും മാറി മാറി നോക്കുന്നുണ്ട്. എല്ലാവരുടെയും കണ്ണ് തന്നിലും തന്റെ കയ്യിലിരിക്കുന്ന മീനിലാണെന്നറിഞ്ഞിട്ടും അമ്മ പുലർത്തുന്നൊരു നിസ്സംഗതയുണ്ട്.. ലോകത്തൊരു അധികാരിയും കാണിക്കാത്തത്.. ഇടക്ക് കാക്കയെ നോക്കി സഹനത്തിന്റെ മൂർത്തി ഭാവമായ പൂച്ചക്ക് നേരെ ഒരു മീൻ തലയെറിയും.. മീൻ തല കടിച്ച്പിടിച്ച് പൂച്ചയൊന്ന് വെപ്രാളപ്പെടും, കാക്കയിലെ കൊതിയൊന്ന് റാഞ്ചലോളം ആളിപ്പടരും.. കോഴിക്ക് കിട്ടുന്ന മീൻകുടൽ പൂച്ചയിൽനിന് വളരെ നേർത്ത മ്യാവൂ ശബ്ദം പുറപ്പെടുവിക്കും.. കത്തിവീശി ആട്ടുമെങ്കിലും അവസാനത്തെ മീൻവെള്ളം തെങ്ങിൻ തടത്തിലേക്കൊരേറുണ്ട്.. കിട്ടാത്തവരും കിട്ടിയവരും എല്ലാവർക്കും ചാകര. മീൻ ചാറില്ലാണ്ടെങ്ങാനാ, ഒരു പിടി വറ്റെറങ്ങാ.. അമ്മയോടച്ഛൻ പിന്നെയും പിന്നെയും പറഞ്ഞുകൊണ്ടിരിക്കും.. ഓരോരോ മീൻ കഥകൾ, അമ്മ നല്ലൊരു കേൾവിക്കാരിയാണ്.. കേൾക്കുമ്പോൾ അമ്മ, പൂച്ചയെപ്പോലെ, കോഴിയെപ്പോലെ കാക്കയെ പോലെ ചില നോക്കുകകൾ, ചില വാക്കുകൾ കാണിക്കും.. മനോഹരം.. ചാക്രികം ചില ആവാസ വ്യവസ്ഥകൾ.